نصر الدين السويلمي لقيس سعيد: 'هاو الفرق بين المسلم والإسلامي غير انت دز في البيدق.. احشم راهو سبحانه يمهل ولا يهمل'

نصر الدين السويلمي لقيس سعيد: 'هاو الفرق بين المسلم والإسلامي غير انت دز في البيدق.. احشم راهو سبحانه يمهل ولا يهمل'

كتب نصرالدين السويلمي:

المسلم والاسلامي.. قيس يلعب بالمصطلحات وفي المساجد زادة!

سي قيس ماك تكتفي بزيارة  واجب ومتطلبات لعلاقات عربية دولية، وما تعملش الاستعراض هذاك الكل وتبقى 3 ايام وتشيد بالسفاح وتكبر بيه وتتحول من زيارة واجب الى زيارة احتفاء وتحالف وتأييد للجريمة والمجرم..

سي قيس ماكش عارف الي هو  قتل المسلمين بشكل جماعي وعامل مجازر عمرها ما شهدتها مصر ؟!
*لا أخي عبد الفتاح السيسي ما قتلش المسلمين،  قتل الاسلاميين !

علاش شنو الفرق؟

*كلمة الاسلاميين  بدعة ماهيش من دينا دخيلة علينا! زيد شقيقي السيسي ورّاني دليل الي الاسلاميين فعلا يتخابروا مع حماس!
خلينا من حماس سوقها وحدو.. علاش سي قيس راهي ما اسمهاش الامة المسلمون، لا سيادتك! راهي اسمها الامة الاسلامية
واسمها منظمة التعاون الاسلامي
و الدول العضوة في المنظمة اسمها الدول الاسلامية
و الهيئات المنبثقة من المنظمة اسمها هيئات اسلامية
وقبل هذا الكل، الدين الي جمعنا  اسمو الدين الاسلامي
والعقيدة الي ندينو بيها لله سبحانه اسمها العقيدة الاسلامية
والدعوة الي انطلقت من حراء قبل اكثر من 1400 عام، اسمها الدعوة الاسلامية
والفتوحات الي تمت اسمها الفتوحات الإسلامية
وراهو اسمو الوقف الاسلامي موش الوقف المسلم
والفقه الاسلامي والتاريخ الاسلامي والمعالم الاسلامية.. من ثم جت الحركات الاسلامية
معناها  كي اسلامي كي مسلم
والشواهد كثيرة غير انت دّز في البيدق في هالعواشير

يا سي قيس افهم حاجة!
راك بديت تتلاعب بالحكومة وبعد بنظام الحكم وبعد تعديت للتلاعب بالدستور، وزدت توغلت في التلاعب بضحايا السفاح ، وماشي وتقوي في التلاعب متاعك وماشي وتكذب وتراكم في الكذب، هاك وصلت للتلاعب بدين ربي سبحانه ومساجد ربي سبحانه، راك ماعادش ليك برشا باش توصل لمرحلة فرعون، تنتهي من مخاصمة أهل الارض الكل ، وتنادي على الكتلة الديمقراطية، تقلها تعملك صرحا لعلك تتطلع الى اله محمد صلى الله عليه وسلم.. احشم راهو سبحانه يمهل ولا يهمل، راهو يأخذك أخذ عزيز مقتدر  ومن حيث لا تدري.