شكون يتآمر على الثورة ويحب يعمل انقلاب ؟

شكون يتآمر على الثورة ويحب يعمل انقلاب ؟

كتب نصرالدين السويلمي:

شكون يدعو حل البرلمان ويصرح لقنوات الامارات باني المدرعات قدام البرلمان سابقة ويصفها بالفضيحة؟ الباجي قائد السبسي؟
شكون الي رفض حكومة سياسية يقودها الحزب الفائز وعمل على حكومة الرئيس وتحول الى حزام للرئيس ثم صباط الرئيس ثم شلاكة الرئيس؟ محمد الغرياني؟

شكون الي طالب بنزول الجيش للشارع واعتقال رؤساء وقادة الاحزاب ووضع البعض في الاقامة الجبرية؟ منذر الزنايدي؟

شكون الي مشى لحفتر وتآمر معاه على تونس؟ النوري الجويني

شكون الي ما يغيبش ساعة زمن على قناة الغد والعربية وسكاي نيوز؟ الهادي البكوش

شكون الي ما يعترفش بالثورة وبالانتقال الديمقراطي وسفه اختيارت الشعب ووصفو بالقاصر؟ محمد الغنوشي؟

شكون احتفل بالانقلاب المصري وشد الرحال لبشار البراميل وهناه بقتل مليون سوري وتشريد 4 ملايين؟ كمال مرجان؟

لا..لا..!

الي عملوا هذا الكل هوما الي يحكوا على قانون العزل!!! ومشنعينها علاش ما تعداش قانون تحصين الثورة!!!

تعرف علاش ما تعداش؟

لاني العقال فاهمين الي بقايا التجمع ما عادش عندها ما تعمل مادام الجيش حسم امرو، والي الخطر على الثورة والانتقال الديمقراطي والديمقراطية والحرية جاي من جماعة كيم جونغ وبول بوت.. بل اتعس واذل واحقر من كيم و بول!! على الاقل ثنائي الرعب الكوري الكمبودي مارسوا الاجرام لصالحهم لحسابهم، وهذوما مرة جايبين السبسي ومرة جايبين عبير مرة جايبين قيس سعيد ومرة ماشين يتسڨعبوا على الجيش، مرة شادين في تمرد ومرة ماشين لصافس  يفتشوا على البرنس، ومرة  يتبعوا في فاطمة المسدي ومرة قفراش........وهـــــــــــــــــــــــــــــــاي طاحت بيهم وطال بيهم  الزمان وجدبت وفلسوا، ولّوا مصطفين وراء الهنتــــــــــــــــــــــــــــــــــــــــــــــاتي، يحبوا المدرعات تبعد باش يقتحموا البرلمان ويعطلوا المسار.

من 2012 عطونا وينهموما الازلام الي باش تحصنوا منهم الثورة، 10 سنوات ظهرت عبير، وكان موش الطمع متاعهم وقلة الخير عجبتهم كي ركزت على رئيس البرلمان راهي عيطت شوي وشدت كرسيها ولفها النسيان، أما هانهم عشعشوها امتصت ليهم قواعدهم.

هات نحسبو من نهار خرج قسيلة في مجموعة يسب وخرج المزوغي في التلفزة يلفق، احسبلي من ثم لليوم، شكونو الي خرب الثورة!  الازلام والا السماسرة الي شادين في قانون العزل؟ شكونو الي خرج في منتصف 2012 يطالب باسقاط المجلس التاسيسي الي وقتيتها بدا اشغالوا بشكل فعلي عندو ثلاثة أشهر.... شكون ارجع للارشيف وحل عينيك.
السلطة منقسمة، انا عندي الباي القصير فيها لكن الباي الكبير عند رئيس الحكومة..!

وقت نقولو الباجي الله يرحمو بغض النظر عن تاريخو الدستوري التجمعي، راهو كان رجل دولة ماهوش رجل لجان شعبية، وراهو يعرف شنو معناها مؤسسات، واي نعم عندو طموح توسعي مع الحبيب الصيد لكن كيف تمرد عليه الشاهد، ما مشاش يدور على الثكنات ويجمع في مجلس الامن القومي ويستدعي ليه في اتباعو! ويحرض على حرق البلاد !! لا ! اما هاو آش قال " السلطة منقسمة، انا عندي الباي القصير فيها لكن الباي الكبير عند رئيس الحكومة..!".